Giduso sa usa ka konsehal sa dakbayan sa Sugbo ang pagpalapad sa regulasyon sa pagdumala sa septage ug apil ang mga piggery ug poultry farms lakip sa pagpahamtang og bayrunon ug silot sa dili motuman sa balaod.
Si Konsehal Joel Garganera nisugyot og mga kausaban sa Sections 3, 6, 15, 19, 26, ug 27 sa City Ordinance No. 2398 o ang Septage Management Program sa Dakbayan sa Sugbo
Si Garganera, atol sa regular session niadtong Miyerkules, Enero 8, 2025, nipasabot nga iyang tinguha nga maapil sa regulasyon ang mga piggery ug poultry farms ug gikinahanglan kining mga negosyo nga magbutang og mga septic tank ug makakuha og septage permit.
Kini base sa rekomendasyon sa Septage Waste Management Board, matod ni Garganera, nga nagpasiugda sa unregulated septage waste management sa daghang backyard hog pen ug poultry farms sa dakbayan, partikular na sa mga bukirang barangay.
“It was observed that most if not all poultry and piggery farms disposed of their waste to rivers and waterways,” matod ni Garganera.
Ang maong praktis nakahatag ug peligro sa kinaiyahan ug panglawas dili lamang sa mga kasikbit nga mga residente kon dili sa mga nagpuyo sa suba ug mga agianan sa tubig.
FECAL COLIFORM
Sa nangaging taho sa VoxPop Cebu, gibutyag nga ang mga basura gikan sa lokal nga mga komunidad, mga baboy ug poultry farms mao ang dagkong hinungdan nga nakatampo sa pagsaka sa lebel sa fecal coliform sa ubos nga bahin sa pito ka agianan sa tubig sa dakbayan sa Sugbo.
Uban niini nga mga nahibal-an, si City Environment and Natural Resources Office (Cenro) head Reymarr Hijara naglaum nga ang City Government magpundo sa pagtukod sa mga communal toilet.
Siya nitug-an sa VoxPop Cebu niadtong Septiyembre 22, 2024, nga ang iyang buhatan nihangyo na sa Department of the Interior and Local Government sa pagmando sa mga barangay leaders sa pagmonitor sa ilang tagsa-tagsa ka hurisdiksyon.
Matod niya nga ang Sangguniang Panlungsod nigahin og budget nga P80 milyones alang niini nga katuyoan sa 2023. Apan, ang mga opisyal sa barangay naglisod sa pagpangita og mga lugar nga kabutangan og communal toilets sanglit kadaghanan kon dili man tanan sa mga bakanteng lote giokupahan sa mga informal settlers.
Matod niya nga banhawon nila ang proyekto sa 2025.
Si Hijara niingon nga daghang mga panimalay sa daplin sa mga sapa ang nagdirekta sa ilang septic waste direkta sa mga agianan sa tubig.
Matod niya nga ubos sa City Ordinance (CO) 2398, nga nag-establisar og Septage Management Program alang sa dakbayan, lakip na ang mga bayrunon ug silot sa dili pagtuman, ang septage inspector mohatag og citation sa panimalay nga walay kasilyas o septic tank.
Bisan pa sa kadaghanan sa mga kaso, ang naglapas nga panimalay wala’y lugar nga nahabilin aron mahimo’g usa ka septic tank, dugang niya, hinungdan sa sugyot nga pagpalambo sa komon o publiko nga pansayan./EHP/RRM