Human sa upat ka sunodsunod nga senemanang pagsaka sa presyo sa gasolina ning unang buwan sa tuig, nialma na ang mga transport group.
Ang mga sakop sa Piston Cebu uban sa urban poor groups nipahigayon og pocket rally sa Lunes, Enero 20, 2025, aron protestahan ang bag-ong pagsaka sa presyo sa gasolina.
Nagtapok ang mga demonstrador sa Dakbayan sa Mandaue nga nagtawag og pagtagad sa kalisod sa panalapi nga gipahamtang sa pagtaas sa gasto sa gasolina sa ordinaryong mga Pilipino.
Gipalanog sa rally mao ang domino nga epekto sa pagmahal sa mga nag-unang palaliton tungod sa kanunay nga pagsaka sa presyo sa lana.
Ang mga nagprotesta nagdala og mga bandera nga naghangyo sa usbaw sa suholan ug pagkunhod sa presyo sa lana ug nag-awhag sa gobiyerno nga molihok dayon.
Ang grupo nag-apud-apod usab og leaflets atol sa protesta nga nagpasiugda sa ilang mga mahinungdanong panginahanglan nga mao ang pagtaas sa suholan, usa ka panawagan alang sa tibuok nasod nga minimum nga inadlaw nga sweldo nga P1,200 ug usa ka binuwan nga suweldo nga P50,000 alang sa mga empleyado sa gobiyerno, ilabi na sa mga magtutudlo ug mga healthcare workers.
Suporta sa mga mag-uuma, pag-apudapod sa yuta sa mga mag-uuma, subsidyo sa produksiyon sa agrikultura, ug pagbungkag sa mga kartel sa bugas aron ipaubos ang presyo sa bugas ngadto sa P25 matag kilo. Lakip sa paghatag og tax relief, ang pagtangtang sa VAT sa mga importanteng butang sama sa lana, kuryente, tubig, ug tambal.
Usa ka panawagan sa grupo alang sa gobiyerno nga ipunting ang pundo sa publiko sa serbisyo sosyal, labi na sa edukasyon ug pag-atiman sa kahimsog pinaagi sa pagsumpo sa korapsyon.
Nanawagan ang mga nagprotesta sa administrasyon ni Presidente Ferdinand Marcos Jr. nga sulbaron kining mga dinalian nga isyu ug nangayo og klaro, aksyon nga solusyon gikan sa mga kandidato nga modagan sa umaabot nga eleksyon.
Nasayran nga ang industriya sa lana sa nasod 'deregula-ted' hinungdan sa panawagan usab sa mga militanteng grupo pagbalik sa regulated nga polisiya aron dili sayon sa mga dagkong kompaniya sa lana sa nasod sa pagpasaka sa presyo labina sa pagduda nga dunay cartel sa industriya.
Ang pag-umento sa presyo sa mga produkto sa petrolyo epekto sa kalibutanong merkado ug kahimtang sama sa gubat.
Apan dunay mga umento nga gikuwestiyon sa mga mili-tante ubos sa pagduda nga mugna sa maninbobra sa cartel sa lana. / CAV / RRM