Nalamba ang PUJ human nadumbolan sa nagsunod nga sports utility vehicle (SUV) sa highway sa Barangay Langtad, Dakbayan sa Naga, alas 6:45 sa buntag, Sabado, Marso 29, 2025.
Ang mga drayber sa maong duha ka mga sakyanan ang pulos nangaangol human sa hitabo.
Sa inisyal nga imbestigasyon ang PUJ drayber giila nga si Benjale Gutana, hamtong, taga Bulogan, Lungsod sa Dumanjug, samtang ang nagmaneho sa Ford Everest mao si Stanislaw Shulman, Israeli national, hamtong, ulitawo, taga Talisay City.
Nasayran nga susama og direksiyon ang duha ka mga sakyanan paingon sa habagatang bahin ug nag-una ang PUJ ug pag-abot sa Langtad, Naga kalit nga mi-right turn ang PUJ ug wa gilayon maka-apply og brake ang nagsunod nga SUV hinungdan nga midumbol sa PUJ.
Gumikan sa kakusog sa impact nalamba ang PUJ ug milahos ang SUV ug nababagan sa Perrelos, Carcar City PNP outpost.
Gipaabot nga magkasabot ang duha ka habig. / DVG
