Gipamulta sa Philippine Basketball Association (PBA) og P100,000 si Converge FiberXers reserve guard Mac Tallo gumikan sa pagduwa niini sa Sinulog Cup pocket tournament sa Dakbayan sa Sugbo dili pa lang dugay.
Atubangan ni PBA Commissioner Willie Marcial, niangkon si Tallo nga nakapakita siya’g aksyon sulod sa lima ka mga duwa sa Sinulog Cup diin siya maoy napiling MVP.
Gipasabot sa produkto sa Southwestern University (SWU)-Phinma Cobras nga wala siya nananghid sa Converge ug hasta sa PBA sa pagtuo nga dili na kini kinahanglan gumikan sa iyang estado nga restricted free agent.
Basi sa nakalagda, nagbalor og P50,000 ang multa sa matag duwa nga duwaan sa usa ka magduduwa nga wala’y pananghid.
Sa kaso ni Tallo, P250,000 unta ang angay nga multa.
Hinuon gipasabot ni Marcial nga tungod kay premiro pa man kining salaod ni Tallo, iyaha lang gius-os ang multa sa P100,000.