Mga duwa karon:
4:00 pm- Converge batok Blackwater
8:00 pm- Meralco batok Rain or Shine
Segurado na ang pagbalik og duwa sa Sugboanong si Mark Jayven “Mac” Tallo sa Philippine Basketball Association (PBA).
Gi-activate sa Converge FiberXers ang maidlas ug 6’0” nga pointguard alang sa ilang labing unang tahas sa Season 48 Commissioner’s Cup batok sa Blackwater Bossing karong alas 4:00 sa hapon, Nobiyembre 8, 2023, sa Philsports Arena human kini nahatagan og pagtugot sa PBA Commissioner’s Office.
Ang produkto sa Southwestern University (SWU) - Phinma Cobras nipirma og duha ka mga tuig nga kontrata sa FiberXers apan nakasugat gihapon og babag ang iyang pagbalik sa liga.
Gipasabot sa PBA nga napahamtangan si Tallo og unom ka mga buwan nga suspensyon human kini nahagbong sa random drug test dihang nagduwa pa kini sa NLEX Road Warriors niadtong 2018.
Hinuon, gipasabot ni PBA deputy commissioner Eric Castro nga nagpadala og suwat hangyo ang No. 1 3x3 player sa Pilipinas ngadto ni Commissioner Willie Marcial niadtong Nobiyembre 3, 2023.
Positibo ang tubag ni Marcial sa hangyo sa kampo ni Tallo.
Sa main game, magpinaksitay ang Meralco Bolts ug Rain or Shine Elasto Painters sugod sa alas 8:00 sa gabii.