Naposasan ang 48-anyos nga taxi driver ug vlogger human giingong gimartilyo niini ang ulo sa iyang 38-anyos nga silingan alas 9 sa gabii niadtong Biyernes, Agusto 28, 2026, sa Sityo Kanipaan, Barangay Basak Pardo, Dakbayan sa Sugbo.
Ang suspek giila nga si alyas Lolu, samtang ang biktima mao si alyas Romy, 38, construction worker.
Base sa imbestigasyon sa Inayawan Police Station, naggikan ang panagbangi sa duha sa basketball game diin nalambigit ang manghod sa biktima.
Giingong gisulong sa suspek ang biktima sulod sa ilang panimalay ug gimartilyo ang ulo niini sa makaduha ka higayon.
Naangol ang biktima ug gidala sa tambalanan, samtang ang suspek nasikop ug gitanggong sa Inayawan Police Station.
Sa pakighinabi sa SuperVoxPop Cebu, niangkon si Lolu sa pagbunal ug niingon nga napuno siya sa maong biktima ug hubog sab siya niadtong higayona.
“Naglagot gyud ko maayo sa gipanulti niya. Unya mura ko'g gisugo sa Yawa nga akong martelyuhon,” dugang ni Lolu. / GPL
