Nakaabante sa sunod round ang Golden State Warriors human nila gipangbuntog ang hosts Houston Rockets, 103-89, sa deciding Game 7 sa ilang Western Conference 1st round playoffs series sa National Basketball Association (NBA) sa Lunes, Mayo 5, 2025 (PH time).
Ning sangkaa, dili si Stephen Curry o Jimmy Butler ang nahimong bayani sa Warriors.
Ang nag-agak sa Warriors mao si Buddy Hield kinsa nirehistro og kaugalingon niyang playoffs career-high nga 33 puntos nga gibuwakan og siyam ka three-pointers.
Sa 1st half, bugnaw pa ang duwa sa duha ka mga lider sa Warriors hilabi na si Curry kinsa igo lang nakamugna og tulo ka puntos sa halftime.
Hinuon, nakamaneho ang Warriors pagposte og 12 puntos nga labaw sa pagpangulo ni Hield kinsa nakamugna na og unom ka three-pointers ning puntoha sa duwa.
“This was not just a lights-out shooting performance for Buddy,” matod ni Warriors coach Steve Kerr.
“It was a two-way performance. I thought his defense was fantastic.”
Sa nahabiling 2:04 minutos sa 3rd quarter, ang Rockets ningpahak sa labaw sa Warriors ngadto sa tulo na lang ka puntos, 63-60.
Ning higayuna, nanginit na og sugod sila si Curry ug Butler aron inaton pagbalik sa dobleng numero nga puntos ang labaw sa Warriors, 75-62, sa sayong bahin sa 4th quarter ug wala na sila molingi pagbalik.
Pagkahuman sa duwa, si Curry nakapupo og 22 puntos diin 14 niini iyang nahimo sa 4th quarter samtang nidugang og 20 puntos si Butler.
Sa 2nd round series, ang Warriors makigbatok sa Minnesota Timberwolves nga ningpalagpot sa Los Angeles Lakers, 4-1, sa 1st round.
Puntos matag usa:
Golden State (103)- Hield 33, Curry 22, Butler 20, Green 16, Podziemski 9, Looney 3.
Houston (89)- Thompson 24, Sengun 21, VanVleet 17, Green 8, Brooks 8, Eason 5, Smith Jr. 3, Adams 3. / Gikan sa AP