DUHA ka mga insidente sa pagpanulis ang natala sa Davao City Police Office sa samang adlaw apan sa managlahing lugar dinhi sa Davao City niadtong Huwebes, Hulyo 10, 2025.
Unang pagpanulis nahitabo sa alas 11: 45 sa buntag sa Zone 3, San Antonio, Buhangin, siyudad sa Davao, kon diin nagpatabang sa Buhangin Police Station ang usa ka 32-anyos nga rider nga giilang si alyas Reil.
Gisaysay ni alyas Reil ngadto sa kapulisan nga naa siya sa dapit aron nga mo-pick-up og parcel sa iyang kauban.
Apan dihang pabalik na unta siya sa iyang motorsiklo, usa ka lalaking nagsul-ob og itom nga jacket ug itom nga shorts, niduol kaniya dayon og tion og pistola sa iyang tiyan.
Daling gikuha sa lalaki ang sling bag sa biktima nga dunay sulod nga cash nga kantidad og P6,500, usa ka Honor cellphone balor og P24,000, gawas pa sa GCash nga dunay sulod nga P1,800.
Human makuha ang nahisgutang mga butang, ang suspek daling nikabayo sa XRM nga motorsiko nga kolor blue ug itom, wa'y plate number nga gimaneho sa naghuwat niyang kauban pila ka metros gikan sa nahitaboan ug nipaturatoy og padagan paingon sa direksiyon sa Barangay Angliongto.
Samtang ang giingong ikaduhang pagpanulis sa laing rider nahitabo sa alas 11:15 sa buntag sa samang adlaw sa Blk. 1 lot 2, DSA Village, Balosong, Matina, dakbayan sa Davao.
Ang biktima nailhan nga si alyas Ross, 24-anyos, taga-Talomo samtang ang mga giingong tulisan gihulagway nga duha ka lalaki nga sakay sa laing motorsiklo nga nagsul-ob og crash helmet nga may itom nga bonnet.
Sumala pa nga samtang nag-deliver si alyas Ross og parcel, kalit nga niabot ang duha ka suspek ug dayon tion kaniya'g pusil. Giilog matud pa sa mga tulisan ang iyang sling bag nga dunay sulod nga lisensiya, mga IDs, cash nga balor og P4,000, cellphone ug yawi sa motorsiklo.
Human sa insidente, mga suspek nisibat paingon sa direksiyon sa Tahimik Avenue sa Matina.
Ang duha ka mga insidente sa tulis padayong pang gipanubayan sa mga pulis aron nga madakpan ug pasakaan og kaso sa hukmanan. (July Aubrey R. Ngo)
