SULTAN KUDARAT - Gikuso-kuso sa buhawi ang napulo ka balay alas 3 sa hapon niadtong Sabado, April 18 sa siyudad sa Tacurong.
Sa taho nga nahagpat gikan sa City Desaster Risk Reduction and Management Office (CDRRMO) nga giigo sa buhawi ang Barangay New Carmen, Tacurong City diin napulo ka mga balay ang nangaguba.
Matud ni Barangay New Carmen, Barangay Kapitan Freddie Brengas nga una sila nga nakasinati og kusog nga ulan, taud-taud gihapak sila sa naghaguros nga hangin nga daw buhawi.
Sa diha nga nakita sa mga sibilyan ang hangin nga nagtuyok didto na sila nanagan paingon sa luwas nga dapit.
Gikuso-kuso sa makusog nga hangin ang napulo ka balay ug gilupad pa ang nagkadaiyang parte niini.
Suwerte nga walay naangol sa mga molupyo apan nakamugna sab kini og kalisang sa ilaha.
Sa kasamtangan nang-apud-apod na og hinabang ang lokal nga panggamhanan sa siyudad sa Tacurong sa mga pamilya nga nawad-an og balay gumikan sa maong disgrasya. (Edgar Fuerzas)