KIDAPAWAN CITY -- Gidakop sa mga awtoridad ang usa ka gatus ka mga tawo sa Kabacan, Cotabato nga wala magsuot og face mask niadtong adlaw nga Huwebes, Mayo 7.
Matud ni Kabacan chief of police, Major Peter Pinalgan, nga ilang gipangdakop ang usa ka gatus ka mga tawo nga naaktuhan nga wala magsuot og face mask atol sa pag-roving sa kapulisan.
Kini kabahin sa National Public Health Emergency nga gideklara ni Presidente Rodrigo Duterte diin gimandoan ang tanan nga mogamit og face mask, sundon ang social distancing, manghugas sa kamot ug uban pa batok Covid-19.
Ang tahas ni Duterte sa panglawas sa katawhan hugot nga gipatuman sa Provincial Government sa probinsiya Cotabato ilabina sa LGU-Kabacan.
Gibulad sa init atbang sa Kabacan Municipal Police Station kadtong kapila na ka higayon nga nadakpan nga wala magsuot og face mask isip silot sa ilang kagahi og ulo.
Nagpahigayon sab og profiling ang kapulisan sa mga nadakpan lakip na ang pagmaymay kanila nga mosunod sa gipatuman nga balaod kabahin sa krisis batok Covid-19.
Subling gi-awhag ni Kabacan Mayor Herlo Guzman Jr. ang publiko nga mosunod sa mando sa LGU ug Provincial Government.
Nagpahinumdom si Mayor Guzman ug Major Pinalgan sa mga kapitan sa matag barangay nga motabang sa pagpahimangno sa ilang mga nasakupan nga magsuot og face mask. (Edgar Fuerzas)