BRUTAL nga gipatay ang usa ka 12-anyos kinsa napalgan nga naglutaw sa irrigation canal sa Barangay Tibal-og, Sto. Tomas, Davao del Norte niadtong Sabado, Hulyo 25, 2020.
Sumala ni Police Major Frederick Deles, ang chief of police sa Sto. Tomas Municipal Police Station, ila dayon nga nasikop ang suspek nga usa ka person with disability, kinsa nakuhaan og usa ka pakite sa gituohang shabu.
"Siya gyud ang natudlo nga suspek so far kay siya ang ulahing nakita nga nag uban sila sa victim. Naa sab kinarwasan ang suspek nga gikonsidera sab sa atong imbestigasyon. Usa siya ka PWD, sa iyang igsuon nga balay na nato siya nasikop kay didto siya mitinir after sa incident," ingon ni Deles sa pakighinabi sa Supervoxpop kagahapon pinaagi sa telepono.
Gipailawom pa sa otopsiya ang biktima aron masuta unsay gikamatyan niini ug madetermina kung napanamastamasan ba kini.
Giandam na sa kapulisan ang posible nga kaso nga ipasaka sa biktima sa paggawas sa resulta sa medico-legal.
