COTABATO CITY -- Sa tinguha nga makasugod og kabag-ohan ug magpuyo nga malinawon nga kinabuhi karong 2020, 12 ka mga sakop sa Bangsamoro Islamic Freedom Fighters (BIFF) misurender ngadto sa militar alas 2 sa hapon, Lunes, Enero 13, sa probinsiya sa Maguindanao.
Gibutyag ni 601st Brigade Commander Colonel Jose Narciso nga tulo ka bulan sila nga nagpahigayon og negosasyon sa lider sa BIFF una kini hingpit nga nibalik sa sabakan sa balaod.
Ang 12 ka mga sakop sa BIFF gipangulohan sa usa ka alyas Kumander Said, ubos sa grupo ni Kumander Karialan.
Dala sa pagsurender sa mga nahisgutan ang mga tag-as nga matang sa armas sa gipahigayon nga programa sa municipal hall sa Sultan Sabarongis sa Maguindanao Province.
Gikanayon ni Mayor Alfizzar Allandatu Angas Sr. nga napulo sa mga rebelde dili molupyo sa Sultan Sabarongis apan tungod sa maayong programa sa lokal nga panggamhanan, uban ang militar ug kapulisan, naaghat ang uban kanila nga motahan na lang sa maong munisipalidad.
Hinuon, giseguro ni Narciso nga matabangan sa gobyerno ang mga nisurender sa pakig-alayon sa local government unit.
Samtang nanawagan si Mayor Angas sa mga rebelde nga mosurender na gumikan dili pa ulahi ang tanan aron nga makabag-o sa kaugalingon ug magpuyo nga malinawon uban ang pamilya diha sa komunidad. (Edgar E. Fuerzas)