HAGONOY, Davao del Sur -- Gipangsikop sa kapolisan ning lungsod ang 12 ka mga indibidwal human nasakpang mitambong sa selebrasyon sa usa ka birthday luyo sa gipatumang enhanced community quarantine (ECQ) didto sa Barangay Paligue, alas 7 sa gabii, Lunes, Abril 20.
Si Police Lieutenant Nilo Emborgo, hepe sa kapolisan, nagbutyag nga ang mga dinakpan kinsa wa niini gipanganlan alang sa ilang dungog naaktuhan nga wa motuman sa physical distancing ug wa sab magsul-ob og face mask samtang anaa sa okasyon.
Matod ni Emborgo nga nahitabo ang pagdakop sa mga suspek human nakit-an ang Facebook post sa usa ka indibidwal kalabot sa maong okasyon.
Sumala sa kapolisan nga hugot nilang gi-implementar ang mga polisiya nga gipatuman aron batukan ang pagkuyanap sa coronavirus disease (Covid-19).
Gihangyo sab ni Emborgo ang publiko nga motuman sa maong balaodnon aron masumpo ang pagkuyanap sa kagaw ug di na kini molungtad sa taas nga panahon.
Kahibaloang nagpaguwa og kantidad P200-bilyones ang nasyonal nga gobyerno aron matabangan ang mga naipit sa ECQ, apan luyo niini daghan gihapon ang wa mituman sa home quarantine. (Orlando B. Dinoy)