KIDAPAWAN CITY -- Duha ka tawo nga biktima sa summary execution ang nakaplagan alas 11:15 sa buntag niadtong adlaw Dominggo sa probinsiya sa North Cotabato.
Sa taho gikan sa North Cotabato Police Provincial Office, nasayran nga nasiplatan sa mga sibilyan daplin sa national highway sa utlanan sa Makilala ug Bansalan, Davao del Sur ang duha ka tawo nga gipangpatay.
Gihulagway nga gibinaklid nga gigapos ang mga kamot ug giputos sa packaging tape ang nawong sa mga biktima nga pulos mga lalaki ug gibana-bana nga nagpangedaron og 18 anyos pataas.
Samtang natusak-tusak sab sa bala sa armas ug dinunggaban ang nagkadaiyang bahin sa lawas sa mga nahisgutan.
Dako ang pagtuo sa mga awtoridad nga posibleng sa laing lugar gipatay ang mga biktima ug gilabay lang sa utlanan sa Makilala ug Bansalan.
Walay mga identification cards nga nakuha ang mga awtoridad sa mga biktima hinungdan nga padayon pa silang giila samtang gisuwat ning balita.
