COTABATO CITY -- Samaron ang magsuong babaye human nibuto ang nahulog nga pusil taas sa aparador alas 10 sa gabii niadtong Biyernes, Disyembre 20, sa dakbayan sa Cotabato.
Giila ang mga biktima nga sila Ella Pasilo, 20, ug Evelyn Pasilo, 25, mga molupyo sa Barangay Rosary Heights 5 sa nahisgutang dakbayan.
Sa taho gikan sa Cotabato City Police Office, nasayran nga nagtan-aw og telebisyon ang mga magsuon sa ilang balay sa dihang aksidenteng nahulog ang 9mm pistol nga gipatong sa taas sa aparador.
Nibuto kini sa makadaghang higayon ug naigo ang mga biktima sa nagkadaiyang bahin sa lawas.
Daling gidala ang mga biktima sa ilang pamilya ngadto sa Cotabato Regional and Medical Center (CRMC) ug giingong naa sa talandugong kahimtang.
Gikanayon sa pamilya nga gigukod sa ilang binuhing iring pasilo ang usa ka ilaga sa taas sa aparador diin nasaghiran niini ang pusil hinungdan nga nahulog.
Sumala pa nga ang armas gipanag-iyahan sa usa ka miyembro sa pamilyang Pasilo, apan wa gibutyag kon unsay trabaho niini nganong dunay gitipigan nga hinagiban.
