DAVAO DE ORO -- Nagpahimangno ang kapulisan sa Davao Region nga mag-ingat gumikan daghan karon ang mangingilad sanglit New Year, daghang kuwarta ang tawo.
Sumala sa kapulisan nga magmabinantayon ug di magpa-ilad aron di masusama sa usa ka 68-anyos nga lola nga nabiktima sa budol-budol gang dihang gihaylo nga kambiyohan ang iyang P2,000 sa kantidad nga P50,000.
Ang insidente nahitabo alas 11 sa buntag atubangan sa Petron Gas Station sa Purok 8, Barangay Poblacion, Mawab, Davao de Oro kinsa ang biktima nailhang si Teresita Butal, 68-anyos, molupyo sa Purok 8-A, Nuevo Iloco, Mawab.
Giingon nga samtang ang biktima nagpaabot og masakyan nga motorsiklo kilid sa dalan, giduol siya sa wala mailhing babaye ug lalaki nga mitanyag kaniya nga bayloan ang iyang P2,000 og P50,000.
Sumala pa nga misugot dayon ang biktima ug nanakay sila sa kolor itom nga traysikol adunay plaka nga 4985 LE nga gimaneho sa wala mailhing drayber samtang usa ka wala mailhing babaye ang milakaw paingon sa direksyon sa Purok 8, Barangay Poblacion.
Samtang ang traysikol nga gisakyan sa biktima uban sa wala mailhing lalaki ug drayber mipadung sa public terminal ug didto gibilin ang biktima ug giingnan nga pahulaton aron ihatag kaniya ang saad nga P50,000, apan ang P2,000 sa edaran, nakuha na sa babaye nga miuna og lakaw.
Sa maong hitabo, gilayong nagpahigayon og hot pursuit operation ang kapulisan sa Mawab Municipal Police Station nga miresulta sa pagkasikop sa drayber sa traysikol ug sa laing usa nga positibong giila ug gitudlo sa biktima nga maoy nangilad kaniya.
Wala pa hinginli ang mga nasikop kinsa gipangkustodiya sa Mawab MPS.
