NAGKIG-AYON karon ang Baguio Police Station sa Barangay Malagos, Davao City sa paghimo og mga pamaagi nga madakpan ang banakon nga mipaak-patay sa 4-anyos nga batang babaye.
Sumala ni Police Major Achilles Bargio, hepe sa Baguio police, nga makigsabot sila sa barangay sa mga angay buhaton aron masikop ang banakon sa dapit asa gipaak ang bata.
Gituohan sa mga residente nga anaa pa ang banakon sa kamaisan sa Purok 4, Barangay Malagos.
Una niini, misiyagit ang biktima ug midagan sa iyang uyoan nga nananggi og mais kinsa mitug-an ang bata nga gipaak siya.
Pipila ka gutlo, naluya ang bata, hinungdan nga gidala nila sa Isaac T. Robillo Hospital sa Calinan apan gideklara kining dead on arrival.
Ning kasamtangan, naningkamot ang barangay paunsa nila madakpan ang maong banakon aron di na kini kapaak pa og laing tawo. (Jeepy P. Compio)