DIGOS CITY -- Gibutyag sa pamuno sa Davao del Sur Police Provincial Office (DSPPO) niadtong Martes, Marso 3, nga isolated cases lamang ang mga nahitabong pagpamusil sa probinsya sa Davao del Sur.
Sumala ni Police Colonel Alberto Lupaz, officer-in-Charge sa DSPPO, nga managlahi ang motibo sa sagunsong pagpamusil sa lalawigan partikular sa siyidad sa Digos.
Naobserbahan nga sagad mahitabo ang pagpamusil sa mga publikong lugar ug bisan adlaw'ng dako, ginahimo kini sa mga kriminal.
Sa uwahing insidente niadtong Lunes, nahimong biktima si Engr. Nicomedes Parilla, ang district engineer sa Department of Public Works and Highways (DPWH)-Davao del Sur, diin nahitabo atubangan sa ilang district office alas 7:55 sa buntag.
"Actually, nagkataon lang ni siya but based sa atong investigation, nahitabo karon, unya nahitabo na pod ugma but they are not related to each other," asoy ni Lupaz sa mga tigbalita.
Gitataw ni Lupaz nga isolated cases lamang ug di pa lala ang sitwasyon.
Aduna na sab gihuptang cartographic sketch ang kapolisan human gihulagway sa testigo ang dagway sa gunman ni Parilla, kinsa naigo sa ubos nga parte sa tuo nga tiyan ug miangol sa drayber nga si Jerry Ombao Calesa.
Kahinumdoman nga niadtong Dominggo, Marso 1, usa ka matadero ang gipusil-patay sa mga wa mailhing suspek human namalit og sigarilyo sa usa ka tindahan sa Barangay Matti sa dakbayan.
Wa na matabang si Bryan Tudi Uga, 45 anyos, taga Purok 5, Bliss Subdivision sa Barangay Matti, giluthang sa mga suspek nga nagsakay og SUV sports vehicle.
Niadtong Pebrero 17, gipusil sab ang 29 anyos nga si Hamid Sampang, fish vendor sa Purok Durian, Lopez Jaena St., Barangay Zone 1, samtang namaligya og isda didto sa Purok Apo 1, Barangay Kapatagan, ning siyudad.
Swerteng nadala ang biktima didto sa Southern Philippines Medical Center (SPMC) sa Davao City.
Niadtong Pebrero 21, usa ka Armando Paquiao, 43 anyos, minyo ug residente sa Barangay Coronon, Sta. Cruz, Davao del Sur, ang gipusil sab samtang nanguha og scrap metals duol sa tower sa Narional Grid Corporation of the Philippines.
Dali gihapong nadala sa SPMC ang biktima alang sa medikasyon.
Hinuon, gipasalig ni Lupaz nga himuon nila ang tanan aron masulbad ang nagkadaiyang pagpamusil sa lalawigan lakip ang pag-ila ug pagsikop sa suspek.
