PATAY ang estudyante human napaakan og iro ala 8:45 sa buntag niadtong Miyerkules sa probinsiya sa North Cotabato.
Giila ang biktima nga mao si Catherine Cabigunda, tinun-an sa Mariano Untal Memorial High School ug nagpuyo sa Barangay New Rizal, M'lang sa nahisgutang probinsiya.
Gibutyag ni Michelle Angulo, midwife sa Brgy. New Rizal nga namatikdan nga dunay sintomas ang dalagita sa rabies kon diin nawad-an siya og panimuot sulod sa internet cafe.
Hadlok ang biktima sa hangin ug tubig nga sinyales sa rabies diin dili sab siya moinom og tambal.
Depresiyon sa kaugalingon ang una nga "finding" sa doktor nga sakit sa dalagita apan sa diha nga gibalhin siya ngadto sa M'lang District Hospital, nadiskubre nga positibo nga dunay sintomas kini sa rabies nga gipaak sa iro.
Nasayran nga niadtong Nobyembre 2019, napaakan matud pa og iro ang biktima apan wala niya kini gipahibalo ngadto sa iyang ginikanan.
Gilubong dayon si Cabigunda aron dili na makatakod sa ubang tawo ang rabies nga naa sa iyang lawas.
Gi-indyeksyunan matud pa dayon og anti-rabies vaccine ang upat ka suod nga higala sa dalagita nga ulahi niyang nakauban.
Kahinumdoman nga usa sab ka 16-anyos sa M'lang ang nakabsan sa kinabuhi gumikan sa rabies sa iro.
Nagpahigayon na ang Municipal Health Office og anti-rabies vaccines sa mga binuhing iro isip kabahin sa Rabies Awareness Month. Edgar E. Fuerzas