MAGSAYSAY, Davao del Sur -- Luyo sa giatubang nga kalamidad sa lungsod ug padayong pagtubag sa lokal nga gobyerno sa mga panginahanglanon sa mga biktima sa linog, usa ka kawani nila ang gipusil sa wa pa mailhing mga kriminal, alas 9:10 sa buntag, Biyernes, Disyembre 27.
Ang mga suspek giingong nagsakay og kolor puti nga Innova ug gihap-an ang biktima atbang sa Badagoy Solar dryer didto sa Barangay Poblacion.
Si Police Major Jeffmar Tercero, hepe sa Magsaysay Police Station, nag-ila sa biktima nga si Philip Marl Delosa Ruelo, 41-anyos, aduna'y kapuyo, ug job order employee sa munisipyo.
Sumala ni Tercero nga gipusil ang biktima samtang nagmaneho sa iyang motorsiklo hinungdan nga nahagba ug daling gitabang padung sa Davao del Sur Provincial Hospital alang sa medikasyon.
Apan, paghidangat sa tambalanan gideklara nga wa na kini gininhawa.
Di pa matungkad sa kapulisan ang motibo sa insidente apil ang pag-ila sa mga suspek nga sumala nakita sa pipila ka mga testigo.
Giawhag sab ni Tercero ang publiko nga motunol kanila og impormasyon kalabot sa bansagon sa mga suspek alang sa paspas nga pagsulbad sa kaso. (Orlando B. Dinoy)