DAVAO DEL SUR -- Ipatuman sa Davao del Sur Police Provincial Office (DSPPO) ang hapsay ug malinawong pagsugat sa tuig 2020.
Wala'y pagahimoong "muzzle taping" sa buka sa ilang armas ang kapulisan ning lalawigan sanglit kumpyansa ang DSPPO nga disiplinado na ang tanan nilang sakop ug modelo sa pagpatuman sa saktong balaod.
Giawhag sab ni Lieutenant Colonel Alberto Lupaz, police provincial director offficer-in-charge, ang publiko nga motaho gilayon kanila kun aduna'y mga sibilyan nga magpaboto sa ilang armas atol sa pagsugat Bag-ong Tuig.
Gideklara sa kapulisan nga malinawon ang selebrasyon sa adlaw sa Pasko mao nga malaumon kini nga mahitabo gihapon sa Bag-ong Tuig.
Karon pa lang naka-alerto na ang kapolisan aron bantayan ang mga katikaran sa palibot.
Nagpahinumdom sab kini sa publiko nga mag-amping sa mga mapahimuslanon sa higayon sama sa mga mangunguot, mangingilad ug kawatan.
Lakip sa gibantayan sa kapolisan ang mga nagdala-dala og pekeng kuwarta ug ubang modus sa mga dautang elemento.
Gawas sa pagpatrolya, aduna sab mga pulis nga gipakatag sa mga pampublikong lugar. Orlando B. Dinoy