BALHOG sa selda sa Talomo Police Station ang usa ka 24-anyos nga lalaki human nasakpan nga iyang gibutangan og bitsin ang baso nga dunay beer.
Ang insidente natigayon niadtong Huwebes, Oktubre 10, sa usa ka resort sa Punta Dumalag, Barangay Matina Aplaya, Talomo District, dakbayan sa Davao.
Subay sa blotter nga natala sa Talomo PNP, nasayran nga giingong giayo'g sumbag sa mga higala si alyas Michael, taga Sto. Niño, Punta Dumalag, human siya masakpan nga iyang gibutangan og bitsin ang baso kung ang iyang mga higala na ang magtagay.
Giingon nga natingala ang iyang mga higala nga dali lang sila nahubog samtang si Michael nga maoy tigtagay, wala gayod mahubog ug dunay sekreto nga baso nga gisuksok sa suok sa ilang giimnan.
Dugang pa, dihang gihiringan sa iyang mga barkada nga katagay ang lihok sa "gunner" didto nasapon nga iyang gibutangan og bitsin ang baso unya butangan dayon niya kini og beer ug gitunol ngadto sa mosunod nga moinom.
Walay duha-duha nga mikulata ang mga katagay ngadto kang Michael hinungdan nga nakahiagom kini og mga bun-og sa kalawasan.
Gilayon nilang gipadakop sa pulis ang suspek, gibalhog sa selda sa Talomo PNP.
Apan, gipabuhian gihapon nila kini gumikan dili sila mopasaka og kaso, kon di ilaha lamang gipatagam.
