UBAY-UBAY ang gipangdala sa mga istasyon sa kapulisan sa Davao City Police Office (DCPO) kagahapong adlawa, Abril 19, subay sa unang adlaw sa pagpatuman sa number coding scheme sa mga Food and Medicine (FM) Pass.
Sa Quirino Avenue, Barangay 3-A, Poblacion ning dakbayan sa Davao, wala kasibat ang giingong mga gahi og ulo nga lungsuranon dihang gipangposasan sila sa taga foot patrol ug mga tourists police sa DCPO.
Bisan og mihatag og pagpasabot ang mga dinakpan, wala sila pasipyata sa kapulisan sanglit gipatuman lamang sa awtoridad ang balaud aron mabatukan ang pagkuyanap sa coronavirus disease (Covid-19).
Sa area of responsibility (AOR) sa Sta. Ana Police Station, daghan sab ang nadala sa istasyon ug gipangpriso human sila nagbaktas-baktas sa kadalanan, kagahapong adlawa.
Nauna nang gibutyag sa DCPO pinaagi sa spokesperson Police Captain Rosario Aguilar nga sa adlaw nga Dominggo walay bisan usa nga makagawas sa panimalay gawas lamang sa mga tawo nga anaa ubos sa Authorized Persons Outside Residence (APOR) subay sa pagpatuman sa number coding scheme.
Gipasabot sa DCPO nga kung dili ingon-anion, daghan ang mga tawo nga moabuso sa paggamit sa FM pass sanglit nakita ni Davao City Mayor Sara Duterte-Carpio nga daghan ang nagbahis-bahis nga mga private vehicles luyo sa pagpatuman sa enhanced community quarantine (ECQ) ning siyudad.
Ang mga nasikop gikatakda nga pasakaan og kasong paglapas sa Republic Act 11469 o ang Bayanihan to Heal as One Act ug violation sa Proclamation no. 922 series 2020 kon Declaring the State of Public Health Emergency sa nasud.
