NEW CORELLA, Davao Del Norte -- Wa pay matumbok nga motibo ang kapulisan sa pagpatay sa manager sa cooperative nga gipusil sa Purok 6A, Barangay Poblacion alas 6 sa buntag, Huwebes, Oktubre 24.
Ang biktima giila nga mao Segundino "Yoyoy" Trocio Comonsad, 46, minyo, administrative manager sa United Laborer's Multipurpose Cooperative (ULMPC) ug molupyo sa P-6C, Barangay Poblacion.
Base sa inisyal nga imbestigasyon, ang biktima sakay sa gimanehong kolor itom nga Kymco motorcycle nga adunay plaka nga 1637 YT nga naglabigar sa dalan padung sa iyang trabaho sa Barangay San Roque.
Apan pag-abot sa nahisgutang dapit, usa ka wala mailhing suspek ang mipusil sa biktima tumong sa nagkadaiyang bahin sa lawas.
Human sa pagpamusil, ang suspek yano lang naglakaw nga mipalayo paingon sa wala masayring direksiyon.
Dead on arrival ang biktima paghidangat sa Davao Regional Medical Center.
Narekober gikan sa crime scene ang tulo ka mga basiyo sa bala sa kalibre .45 nga pistola ug ang motorsiklo nga iya sa biktima. (Dexter T. Visitacion)