KINAHANGLAN ang pagkamatinud-anon ug pagsunod sa mga guidelines nga gipagula sa gobyerno aron dali nga mabatukan ang coronavirus disease (Covid-19).
Kini ang gibutyag ni Davao City Mayor Sara Duterte-Carpio nga kung mosunod ang katawhan sa mga guidelines ug di mamakak sa ilang gibati sa panglawas, dali lamang makontrola ang Covid-19.
"Ang pag-spread sa virus, depende sa batasan sa tao. If they follow, mapadali ang pag-stop sa spread sa disease. Pero kung dili na mabuhat, madugay gyud ta," ingon ni Mayor Inday.
Aron dali nga maputol ang pagkuyanap sa virus, kinahanglan nga motug-an sa gibati sa panglawas ngadto sa awtoridad kung dunay balatian nga susama ang sintomas sa Covid-19.
"Ang success sa quarantine would depend sa compliance sa mga tao, nga nakasabot sila nga kinahanglan nato maputol ang pag-spread sa disease," sulti ni Mayor Sara, Sabado sa gabii, Marso 21,human dunay duha ka kompermadong kaso sa Covid-19 sa Davao City. (Jeepy P. Compio)