MAGSAYSAY, Davao del Sur -- Mga molupyo sa high-risk area nga Barangay Malawanit ang unang maka-benepisyo sa mga housing units nga ipatukod sa National Housing Authority (NHA), asoy sa opisyal niadtong Huwebes, Disyembre 25, 2019.
Gibisita ni NHA general manager Marcelino Escalada ang relocation site sa Purok 5 aron maseguro nga mahuman kini sud sa tulo hangtod upat ka bulan.
Mokabat sa 71 pre-fabricated units ang ipatukod sa NHA sa lugar. Aduna kini septic tank ug energy panel structure o sandwich panel nga adunay sukod nga 5X5.1 metros.
Anaa sa 117 ka pamilya ang nawad-an og balay sa lugar human mitay-og ang upat ka kusog nga linog sukad Oktubre ug niadtong Disyembre 15.
Sumala ni Mayor Arthur Davin nga ang 2.5 ektaryang luna nagkantidad og P1.5 milyones ug gipalit sa Dumper Pary-list pinaagi ni Representative Claudine Diana-Bautista.
Ang ubang bakwit nakatukod na og mga balay nga ginama sa "kalakat" human nanghatag ang mga non-government organizations ug ubang pribadong kompaniya og badyet alang sa pagtukod niini.
Gipasalamatn sab ni Davin ang NHA sa paspas nga akomodasyon kanila.
Nasayran nga ang maka-benepisyo sa pabalay sa gobyerno mao kadtong gisuta sa Philippine Institute of Volcanology and Seismology (Phivolcs) ug Mines and Geosciences Bureau (MGB) nga nanimuyo sa mga "high-risk areas" nga peligro sa landslides ug soil erosions panahon sa kusog nga linog.
Gitataw ni Davin nga moabot sa 13 ka relocation sites ang ilang gikinahanglan, apan hinay-hinay na kining gisugdan pinaagi sa pakig-negosasyon sa mga tag-iya sa pribadong luna.
Sa una o ikaduhang semana sa bulan sa Enero 2020, laing duha ka relocation site ang paliton sa lokal nga gobyerno.
Sukad niadtong Oktubre nga linog, anaa na sa 1,662 ka pamilya ang apektado ug anaa sa mga evacuation center.
Moabot na sa 12,000 ang natalang nadamyos sa inisyal nga assessment sa Incident Command Post human ang linog niadtong Disyembre 15.
Samtang, ang NHA nipasalig nga mo sunod na ang pagtabang sa mga biktima sa ubang lungsod sa Davao del Sur.
Matud ni NHA-Davao Regional Manager Rolando Teves Jr. nga ang lokal nga gobyerno maoy mangita og luna alang sa relocation site ug ang NHA ang moalokar og P260,000 sa matag balay.
Si Teves nitataw nga ang ubang mga dapit sa lungsod sa Hagonoy mangayo og tabang sa nasyonal nga gobyerno aron makapalit og luna.
Gawas sa Padada ug Hagonoy, ang mga lugar nga nanginahanglan og mga relocation sites mao ang Magsaysay, Kiblawan, Matanao, ug Bansalan.
Sukad Disyembre 23, anaa na sa 81,444 pamilya sa Davao del Sur ang apektado sa linog diin ang 7,720 niini anaa sa mga evacuation centers ug ang 21,600 ang mihiklin pinaagi sa mga home-based evacuation camps. (Orlando B. Dinoy)