COTABATO CITY -- Usa ka sundalo ang namatay samtang laing 12 ang naangol human mabalintong ang gisakyan nga military truck alas 9:45 sa buntag niadtong Huwebes Santo, Abril 9.
Giila ang namatay nga si Corporal Mitra Anthony Sucaldito samtang ang naangol mao sila Private First Class Neil Patrick Ingreso (drayber), Corporal Jared Sugagil, Corporal Joel Lagos, Corporal Marvin Gatchalian, Corporal Robert De Asis, Corporal Ian Camporedondo, Corporal Jordan Cellio, Private First Class Jesrel Ambat, Corporal Ryan Ignacio, Private First Class Harve Fabro, Private First Class Aivan Figueroa ug Corporal Cedrick Javares, pulos miyembro sa Marine Battalion Landing Team (MBLT-2).
Sa taho gikan sa Sultan Kudarat Police Provincial Office nasayran nga sakay ang mga biktima sa KM450 Military truck gikan sa ilang kampo ug paingon unta mamalengke sa Pigcawayan sa North Cotabato.
Apan pag-abot sa mga sundalo sa Barangay Alamada, Sultan Kudarat, Maguindanao Province kalit lang mibuto ang unahan nga ligid sa truck ug wala na makontrol sa drayber ang manobela.
Tungod kusog ang dagan, nabalintong kini daplin sa national highway.
Patay on the spot si Corporal Sucaldito human naipit sa truck.
Abtik nga nagresponde ang ambulansiya sa Pigcawayan Municipal Health Office ug sa lokal nga kagamhanan sa Sultan Kudarat ug gipangdala ang mga samaron ngadto sa Cotabato Regional and Medical Center sa siyudad sa Cotabato. (Edgar E. Fuerzas)