WALA na makatrabaho ug dul-an P1 milyon ang gasto sa ospital ug medisina ang usa ka 55 anyos nga taga Purok 3, Barangay Talomo Proper, Davao City gumikan nagpa-gluta drip.
Ang 55 anyos nga si alyas Merla midangop ug nagpa-blotter sa kapulisan sa San Pedro Police Station ug iyang gisaysay ang iyang nadangatan niadtong Lunes.
Giingon ni Merla nga niadtong Disyembre 5, 2019, mi-avail siya sa hanyag sa usa ka beauty parlor sa dalang Magallanes, Davao City alang sa ilang Gluta Drip product.
Dunay tulo ka mga session ang gluta drip nga hanyag sa maong beauty parlor aron suma pa moputi gayod ang kustomer.
Sumala ni Merla nga sa unang session, nakatulog siya og mga 15 minutos sa pag-drip kaniya, ug hilabihan ang iyang katingala nga perte lang man dali-a nahuman, hinungdan nga nagduda na siya.
Dagtang og usa ka semana sa ikaduhang session, iyang nadiskubrehan pagkahuman sa drip nga wala diay nabutangan og Vitamin C ang drip nga gi-inject kaniya ug nangayo suma pa og pasaylo ang mga staff sa beauty parlor.
Saysay sa blotter nga sa pag-uli ni Merla sa ilang balay, gikalintura siya ug dihang iyang gipahibalo ang beauty parlor, walay bisan usa nga staff ug tagdumala ang mi-reply kaniya.
Wala na niini gitiwas ang ikatulo nga session gumikan naglain na ang iyang lawas ug nangatol na ang iyang kinatawo, hinungdan nga niadtong Disyembre 16, 2019 nagpa-laboratory examination siya sa Davao Doctor's Hospital.
Sa resulta migula nga kinahanglan, ma-confine siya sa ospital, hinungdan nga nagpa-confined si Merla sa San Pedro Hospital ug migula nga duna kini sakit sa atay diin dako ang iyang katingala nga dili man siya mo-sigarilyo ug mo-alak, apan ang pagpa-gluta drip ang iyang gipasanginlan niini.
Nasayran nga usa ka bulan nga nag-antus sud sa ospital ang biktima diin mokabat sa P1 milyon ang iyang nagasto dala sa bill ug mga tambal nga iyang giinom.
Human sa pagpa-blotter sa kapulisan sa San Pedro Police Station, gihikay na sa biktima ang pormal nga pagpasaka og kaso sa tagdumala sa usa ka beauty parlor sa Magallanes sa dakbayan sa Davao.
