KARONG adlawa, Abril 18, magsugod na ang pagpatuman sa number coding scheme sa paggamit sa food and medicine (FM) pass aron malimitahan ang paggawas sa mga tawo luyo sa pagbatok sa gobyerno sa pagkuyanap sa coronavirus disease (Covid-19).
"We will implement this to really control the movement of the people going out of their residents," butyag ni Davao City Police Office (DCPO) director Kirby John Kraft.
Giingon sa opisyal nga daw nag-abuso ang pipila ka mga tawo sa paggamit sa FM pass, butang nga giistriktuhan ang pagpatuman niini.
Nakita sa kapulisan ug bisan ni Davao City Mayor Sara Duterte-Carpio nga daghan gihapon nga mga pribadong sakyanan nagdagan sa kadalanan luyo sa pagpatuman sa enhanced community quarantine (ECQ).
Dugang sa opisyal, "I hope nga masabtan sa mga tawo nga kita ang gadala sa kagaw, kita ang ga-suroy-suroy, kita ang ga-spread og kagaw. Mao nang kinahanglan nga magpuyo ta para dili ta matakdan."
Nasayran nga mga numero nga nagsugod sa FM pass og 1,3,5,7,9 mao lang ang makagawas sa mga adlaw'ng Lunes, Miyerkules ug Biyernes, samtang ang dunay numero 2,4,6,8,0 kadto lang usab ang makagawas sa adlaw'ng Martes, Huwebes ug Sabado.
Sa adlaw nga Dominggo, walay gitugtan nga mogawas sa balay, gawas lamang sa mga frontliners ug mga tawo nga anaa ubos sa Authorized Persons Outside Residence sama sa mga tigbalita ug uban pa nga nakalatid sa Executive Order 23-B.
Sumala sa DCPO nga anaa sila'y gimuntar nga 46 control points duol sa mga palengke ug grocery stores sa tibuok siyudad sa paneguro nga misunod gayod ang katawhan sa number coding kay kung makasupak niini, makasohan og disobedience ug violation sa Bayanihan Act. (Jeepy P. Compio)