MOHATAG og reward ang si bisan kinsa nga taga Barangay Malagos, Calinan District, Davao City nga makadakop og banakon sa ilang dapit.
Kini ang gibutyag ni Barangay Malagos Kapitan Arnel Liong luyo sa pagkamatay sa 4-anyos nga batang babaye human giingong gipaak sa banakon sa kamaisan sa Purok 4 sa maong barangay.
Sumala ni Kapitan Liong, buhi man o patay nga banakon, dalhon lang sa barangay aron mahatagan sila og reward nga mokantidad sa P5,000.
"Mohatag kita og reward sa makadakop, kini ang usa sa mga pamaagi aron makubsan ang atong kahadlok ngari sa atong dapit nianang banakon," tipik sa gisaysay sa kapitan sa dxAB Radyo Patrol.
Una niini, misiyagit ang biktima ug midagan sa iyang uyoan nga nananggi og mais kinsa mitug-an ang bata nga gipaak siya.
Pipila ka gutlo, naluya ang bata, hinungdan nga gidala nila sa Isaac T. Robillo Hospital sa Calinan apan gideklara kining dead on arrival. (Jeepy P. Compio)