PATAY ang usa ka 55 anyos nga lalaki human kini misukol sa kapulisan sa Bunawan Police Station atol sa buy-bust operation alas 2:40 sa hapon niadtong Lunes, Abril 20, didto sa Block 9, Muslim Village, Barangay Ilang, Davao City. Si Police Major Noel Villahermosa, hepe sa Bunawan police, nag-ila sa napatay nga suspek nga si Roger Jimlani, alyas Ore, 55 anyos, laborer ug anaa nagpuyo sa maong dapit. Sumala sa kapulisan nga notadong tigpayuhot og ilegal nga druga sa dapit ang napatay nga suspek ug bisan gipatuman ang hugot nga seguridad labot enhanced community quarantine (ECQ), nakigtransaksyon gihapon ang suspek sa nagtakuban nga pulis. Dihang nagpositibo nga mobaligya ang suspek og shabu, gilayong gikasa ang operasyon, apan dihang namatikdan sa suspek nga mga pulis ang iyang katransaksyon, kalit kining mibunlot og .38 nga revolver dayon gipamusil ang operatiba. Sa maong hitabo, gilayong giniyutralisa ang suspek, hinungdan sa hinanaling kamatayon niini ug nakuha sa iyang posisyon ang duha ka pakite sa gituohang shabu ug ang .38 revolver. Si Villahermosa nagbutyag nga dili sila mohunong sa operasyon sa pagbatok sa ilegal nga druga hangtud nga di hingpit nga malimpyo ang ilang dapit sa mga tigpayuhot og ilegal nga druga. (Jeepy P. Compio)