NAGPAGAWAS ang lokal nga kagamhanan sa dakbayan sa Davao og "cease and desist" order ngadto sa tanang mga opisyal sa barangay sa pag-isyu og "quarantine passes" kay nakahatag kini og kalibog ug kayagaw sa Dabawenyos ug ang social distancing protocol nasakripisyo.
Sa pahayag nga gipagawas Miyerkules sa buntag, Marso 25, ang lokal nga kagamhanan sa siyudad sa Davao nagtambag sa mga kapitan sa barangay nga ihunong ang pagpanghatag sa maong "passes" samtang naghuwat alang sa tataw nga sumbanan gikan sa LGU.
Si Mayor Sara Duterte-Carpio, sa paghinabi sa 87.5 FM Davao City Disaster Radio, nagkanayon nga iyang gihunong ang pagpanghatag niini tungod ang dakbayan wala pa ilawom sa enhanced community quarantine.
"Nakit-an man god nako nga... initially OK siya kung within the barangay ka lang. Ideal gyud siya. Pero when you go out sa barangay, dili na siya mahimong possible because dili unified ilahang guidelines. Managlahing kapitan, lahi pod ang ilang guidelines," pagklaro ni Duterte-Carpio.
Iyang giklaro nga ang mga "passes" ihatag lang kon dunay "lockdown".
Base sa gipagawas nga nasudnong sumbanan sa enhanced quarantine: tanang trabaho sa publiko ug pribado suspendido ug mobalhin ngadto sa "work from home" gawas sa mga "essential workforce" sama sa pulis ug medical personnel; tanang mass transportation suspendido; ug tanang establisemento sirado gawas lang sa pagkaon ug "health".
Apan, sumala niya nga ang sumbanan nga nahisgutan wala mahisguti sa iyang bag-ong gipagawas nga Executive Order No. 20-A, nga naglimita lang, ug wa mag-"restrict" sa pipila ka mga sumbanan.
Dugang pa niya nga ubang mga barangay nagpagawas sab og lahi nga mga "passes" sama sa food pass, work pass, ug tanang ubang passes, maoy hinungdan nga nagpagawas siya og suspensiyon sa paghatag og passess ngadto sa ilang mga molupyo.
Hinuon, ganahan siya sa paningkamot sa mga opisyal sa barangay sa ilang inisyatibo aron maseguro nga tanang mando sa siyudad istriktong gipatuman sa ilang mga lugar, apan matud sa mayor kinahanglan nga maghuwat sila sa mando sa sa lokal nga kagamhanan aron nga malikayan ang kayagaw ug kalibog.
Samtang gisulti ni Barangay Tibungco Captain Merjade Calvo ngadto sa VoxPop Davao nga ang iyang barangay mosunod ngadto sa mando sa mayor.
Una sa suspensiyon sa passes, gikanayon ni Calvo nga dunay pag-ubos sa mga tawo nga nagsuroy-suroy sa ilang barangay.
