SUGOD Lunes,Marso 23, ang lokal nga kagamhanan sa Davao City mopahigayon og "rolling out food rationing" ngadto sa 50,000 ka pamilya nga nahunong ang panginabuhi gumikan sa coronavirus disease (Covid-19).
Ang pagrasyon sa pagkaon magsugod gikan Marso 23-27, 2020 ngadto sa mga Dabawenyos nga naapektuhan, sa "no work, no pay" workers, ingon man ang mga self-employed ug kadtong nahunong ang trabaho sa temporaryo nga pasirado sa mga negosyo ning siyudad.
Aron makahimulos sa relief goods, dunay ration cards nga ipanghatag ang City Social Services and Development Office (CSSDO) nga gipaagi sa mga barangay leaders.
Gipasabot ni Davao City Mayor Sara Duterte, nga ipatuman ang social distancing ug gipaneguro niya nga mapahigayon ang maayong proseso sa distribusyon.
Sumala sa mayor nga monitoron sa ilang mga team leaders ang mga barangay kapitan nga mopahigayon sa pagpang-apod-apod sa mga ration cards.
Nanawagan sab ang mayor ngadto sa mga pribadong sektor nga mohatag og mga relief goods, nga kung mamahimo dili mohatag direkta sa katawhan aron dili masamok ang pagpanghatag.
"Ginabawal namo ang private sector sa paghatag og mga relief goods directly sa mga tao, because this will create chaos, this will be disorganized, and this will cause people to mass gather," ingon ni Mayor Sara.
Sa gustong mohatag nga pribadong sektor, suma sa mayor nga makigkoordinar sa lokal nga kagamhanan ning siyudad aron matabangan sila sa pagpang-apod-apod. (Jeepy P. Compio)