KIDAPAWAN CITY - Gibaharan karon sa Presidential Task Force on Media Security o PTFoms ang mga tawo nga nagprotekta sa utok sa pagpatay kang Brigada News FM anchor Eduardo Dizon sa siyudad sa Kidapawan.
Kini human gipagawas sa RTC 12th Judicial Region ang warrant of arrest batok kang Dante Tabusares alyas Bong Encarnacion.
Ang pasidaan gihimo sa tanan nga mga lokal nga opisyal ug bisan sa mga pulis nga lagmit nagtago kang Tabusares.
Sa sulat nga gipadala ni Director Undersecretary Joel Egco kang Police Brigadier General Alfred Corpus ang nangulo sa Police Regional Office o PRO 12 nga si Encarnacion nasiplatan sa siyudad sa Kidapawan nga dunay mga armado nga security escort.
Klaro sab ang giluhatan sa PTFoms nga pasakaan og kaso ang si bisan kinsa nga nagprotekta kang Encarnacion.
Gumikan niini gimando ni General Corpus sa tanan nga mga pulis sa rehiyon dose nga dakpon ang suspek kung makit-an kini sa ilang dapit isip pagpatuman sa warrant of arrest nga gi-isyu sa korte.
Gipamahayag sab ni Kidapawan City Chief of Police Lt Col Ramel Hojilla nga padayon nilang gipangita si Encarnacion nga pabalhin-balhin og gipuy-an sa dakbayan.
Gipasusi na sab ni Hojilla ang mga tugpahanan sa eroplano ug pantalan sa barko aron dili na makagawas sa nasud si Encarnacion nga maoy utok o mastermind sa pagpatay kang Dizon. (Edgar Fuerzas)