DAVAO DEL NORTE -- Giingong luwas na sa makuyaw nga kahimtang ang babayeng sakop sa Civil Security Unit (CSU) sa lokal nga panggamhanan sa Panabo City human dunggaba sa usa ka lalaki samtang nag-duty sa Panabo City Public Terminal sa siyudad, Hulyo 13, 2025.
Tingkagol sulod sa selda sa kapulisan sa Panabo City Police Station ang suspek human makulatahi sa mga tawo ug nadakpan sa mga awtoridad sa maong adlaw.
Giingong alas 5:00 sa hapon, niabot si Pat. Niel E. Kasim Jr. sa Panabo City Police Station ug gi-endorso ang suspek nga ginganlan og Warnito Nunez Malubay, 49-anyos, minyo, construction worker ug molupyo sa Purok 13, Lubogan, Toril, Davao City.
Ang suspek giingong naaresto human giluba niini ang biktima nga si Grena Casalta Decena, 54-anyos ug molupyo sa Purok 4, Barangay San Vicente, Panabo City.
Gibutyag nga ang biktima nakahiagom og samad dinunggaban sa lawas human nga giluba sa suspek gamit ang mahait nga kutsilyo.
Gidali pagdala ang biktima sa Davao del Norte Hospital (Carmen Zone) aron siya matambalan.
Apan wa madugay gibalhin siya pagdala sa Davao Regional Medical Center sa siyudad sa Tagum alang sa dugang medikasyon kon diin gikanayon nga naa na sa luwas nga kahimtang karon.
Base sa inisyal nga imbestigasyon nga samtang ang biktima nag-duty sa terminal nga naa sa Barangay New Pandan, usa ka wala mailhing babaye ang niduol kaniya ug nangayo’g panabang.
Samtang iyang giasikaso ang maong babaye, kalit nga niabot ang suspek ug sa wala masayring rason, giluba ang biktima.
Narekober gikan sa crime scene ang usa ka swiss knife nga dunay gitas-on nga 30 pulgada.
Kahinumdoman nga daw dunay eksena sa pelikula ang sitwasiyon sa terminal sa maong adlaw.
Kini human nga daw dunay natigayong rambol, diin gitabangan og kulata sa mga tawo ang suspek nga nangluba sa sakop sa CSU.
Subay sa inisyal nga imbestigasyon, nagbangi ang suspek ug ang asawa niini sa tapad nga fast food chain.
Atol sa ilang away, nikalit og dagan ang asawa sa suspek padulong sa terminal aron didto mangayo og tabang.
Sa maong takna, gisugat kini sa CSU aron husayon silang duha apan kalit siyang gidunggab sa suspek.
Atol sa pagdagan sa suspek human sa iyang pagpanunggab, gisugat sab kini sa mga tawo sa dapit diin sagad mga pedicab drivers sa terminal diin daw gilamok og mga kinumo ang suspek hinungdan nga nadakpan sa awtoridad.
Dugang nasayran nga anaa sa impluwensiya sa ilimnong makahubog ang suspetsado kinsa gikustodiya na karon sa kapulisan. (Dexter T. Visitacion uban sa taho ni Jeepy P. Compio)
