GIPABORAN sa kadaghanan sa mga netizens nga gikan sa Sta. Cruz, Davao del Sur ang gihimong survey pinaagi sa Facebook ni Sta. Cruz Mayor Jose Nelson "Tata" Sala, Hulyo 15, 2025, kung diin siya nangutana sa pulso sa katawhan kung lihukon na ba ang pagsugyot nga himuong siyudad ang munisipyo.
Sa maong post ni Sala, siya nagbutyag nga kung mosugot ang katawhan sa Sta. Cruz (Sta. Cruzians) sa plano, mopa-sponsor siya kang Davao del Sur Congressman John Tracy Cagas, ang lone Congressman sa Davao del Sur og balaudnon alang sa katuyoan human ang State of the Nation Address (Sona) sa pangulo pila ka adlaw gikan karon.
"Ang bill, dali ra man mangita og co-sponsor," sulti sa mayor.
Sagad sa mga netizens dali nga mitubag nga dugay na nilang pangandoy nga mahimong siyudad ang munisipyo alang sa mas paspas nga kalamboan.
Hinuon, sa pasiunang post sa Supervoxpop page, Hulyo 16, may mga mipadangat sab sa ilang pagduha-duha sa pag-convert sa Sta. Cruz ngadto sa usa ka siyudad. Lakip sa ilang mulo mao ang kakuwang sa mga pasilidad sama sa ospital, nindot nga karsada, pampublikong sementeryo, mga
barangay nga may suliran sa langaw, ug uban pa.
Hinuon, ang maong sugyot ni Mayor Sala, dili pa pinal ug gikabutyag nga padayon pa ang kunsultasyon ug pagpamulso sa buot mahitabo sa katawhan sa dapit.
Ang Sta. Cruz, mao ang sikbit nga munisipyo sa siyudad sa Davao ug gitratar nga usa ka first class municipality sa probinsiya sa Davao del Sur.
Ang lungsod aduna'y kapin sa usa ka gatus ka libo nga mga molupyo nga may 18 ka mga barangay ug nailhan sab nga duna'y daghang mga planta sa mga dagkong kompaniya nga mihatag og panginabuhian sa katawhan sa lugar.
Namugna ang munisipyo sa Sta. Cruz niadtong Oktubre 5, 1884 kon naa na sa kapin 140-anyos ug gitratar nga usa sa labing karaan nga lungsod sa Davao del Sur. (July Aubrey R. Ngo)
