NAGSUGOD na ang matag karon ug unya nga kasaulogan sa Misa sa Basilica Minore del Santo Niño sa Sugbo agi og tipik sa kapistahan sa Batang Santo, ug sa kasaulogan sa Sinulog Festival karong Enero 19.
Sa mga deboto sa Simbahang Katolika, ang bulan sa Enero ang ginaatangan gumikan sa maong kasaulogan sa Cebu City ug ning bulana sab ang "Traslacion", ang prosesyon sa Black Nazarene didto sa Quiapo Church sa Kaulohang Manila.
Ang mga parokya sab sa mga simbahan sa nagkadaiyang dapit sa nasud duna sa'y ipahigayon nga prosesyon sa Black Nazarene ug sundan kini sa kapistahan sa batang santos Senyor Santo Niño.
Bulan sa Enero sab ang tingpit-os sa bulsa sa pipila, gikan sa grabeng gasto sa Disyembre, pag-abot sa Enero, minghoy kaayo ang bulsa, puwera sa uban nga dunay mga negusyo ug kadtong mga adunahan, kay naa man gyod sila'y salapi, apan kadtong wala'y mga savings nga trabahante sa kompanya, tanglad-tanglad lang una.
Bitaw, basta Enero molupad gyud ko padung sa Sugbo, magpaulan gyod ko sa Sinulog Festival, nganong nakasulti ko nga magpaulan? Gumikan kay matag Sinulog moulan nga suma nila grasya kini sa tibuok tuig.
Kining Pinoy lagi kita, tuo-tuohon, motuo gyod kita, wala baya sab mawala kung motuo kita, basta lamang magpa-ilad, kay basin masusama kita sa panahon nga sikat kaayo ang money investment schemes sa Davao Region, daghang na-scam.
Diha ko'y higala nga sobra kaayo ang iyang grasya nga nadawat sa 2019, akoa siyang gidani nga mouban kanako sa Enero 19 aron mangayo na sab og grasya sa batang santo, apan nangyam-id siya, pero dihang gipalawman na nako ang istorya subay sa iyang mga nadawat nga grasya sa 2019 kay didto man kami, siya miingon nga bisan pila ang kantidad ticket sa eroplano mouban gyud siya nako.
Mas lingaw na hinuon akong biyahe, kay naa nakoy kauban. Pero bisan wala siya, malingaw gihapon ko sa mga grasya nga akong paaboton, madasigon ko nga moduyog sa maong kapistahan kay nasayod ko nga kung anaa ang tim-os nga pagsalig Kaniya, ihatag gayod Niya ang atong mga gipangayo.
Dili man kinahanglan nga moadto gyod mo sa Cebu City aron magrasyahan sa 2020, bisan naa lang kita sa atong panimalay, okay kaayo, basta lamang kinasingkasing ang atong pagtuo Kaniya, ug nangayo kita Kaniya, nan dili gayod Niya kini ihikaw kanato.
See you Cebu City! Viva Pit Senyor!
