GIDASIG ni Davao City Mayor Sara Duterte-Carpio ang tanan nga kinahanglan magmabinantayon sa palibot aron malayo sa disgrasya nga hinimoan sa mga dautang tawo.
Kini ang tipik sa pamahayag sa mayor sa iyang pamulong atol sa usa ka adlaw una ang ika-17 ka tuig anibersaryo sa Francisco Bangoy International Airport bombing, kagahapon.
Marso 4, 2003 mibusikad ang bomba sa waiting shed gawas sa karaang Francisco Bangoy International Airport sa Barangay Sasa nga gikamatay sa 21 ka mga tawo ug lain pang 145 ang naangol.
Matag tuig gayod mohatag og respeto ang tanang opisyal sa lokal nga kagamhanan sa Davao nga pangunahan sa mayor diin sa anibersaryo, modagkot og kandila ug mohalad og bulak ug pag-ampo ang mayor ug ang mga kabanay sa mga biktima.
Dili lang kini nga pagbuto sa bomba ang natigayon sa Davao City, naa ang Sasa Wharf bombing niadtong 2003, Valentines bombing niadtong 2005, naa sab ang Roxas Night Market bombing niadtong 2016 nga kining tanan gikalas sa daghang kinabuhi.
Sa katuyoan nga aron mabantayan pa ang mga Dabawenyos, si Pangulong Rodrigo Duterte nga mayor pa nianang mga tuiga, mimugna og kahugpungan sa awtoridad, hinungdan nga natukod kining Task Force Davao.
Sa karon, mas gipakusgan pa ang pagpatuman sa kahapsay ug kalinaw sa seguridad sa dakbayan aron di na masubli ang mangilngig nga kagahapon sa siyudad.
Sa tanang Dabawenyos, ang pagkamabinantayon ang labing importante ning mga panahona, i-report dayon sa awtoridad kung dunay mga kadudahang lihok sa tawo diha sa publiko.